كرمال هاو كلّن ما تعتبوا عليي... (شيرين حنا)
اليوم 21 آذار بداية الربيع، ومش بالصدفة عيد الأم...
اليوم فكّرت عايد الأمهات بلبنان عموما ومنطقة جزين خصوصا، بس وقفت عند كذا "إم"...
ففكّرت بـ"إم" اللي رُحّل خارج لبنان بسبب خوفو من قضية "العمالة"، على الرغم من إنو حتى اليوم ما قدرت الدولة ترجعو على بلادو... فكيف شعورا وهيي بعيدي عن ولادا؟ كيف بدي قلّا ينعاد عليكِ؟
فكّرت بـ"إم" اللي استشهد ابنا وروى الأرزات بدمو انكان بالعيشية أو جزين أو الساحل من وادي بعنقودين و... ليبقى لبنان، بس طلع دمو عم يروح هدر... قولكن كيف بعدا بعقلا؟ كيف بدي قلّا ينعاد عليكِ؟
فكّرت بـ"إم" اللي انخطف وما انعرف مصيرو حتى اليوم... وهيي عم تطالب تعرف وينو ورضيت بالآخر يبعتولا رفاتو بس تعرف شو صار... قولكن عم تنام؟... كيف بدي قلّا ينعاد عليكِ؟
فكّرت بـ"إم" اللي ولادا سافروا لأن ما لاقوا وسيلة توظيف بالمنطقة وبلبنان، وتركوها لحالا عايشة بالوحدة... قولكن مبسوطة؟ كيف بدي قلّا ينعاد عليكِ؟
كرمال هيك، فكّرت كتير، وقلت رح قلّن:
"شكرا" يا هالإمهات لأنكن علّمتونا انو الرجولة طلعت منكن
"شكرا" يا هالإمهات لأنكن علّمتونا انو الأرزة ارتوت من دموعكن وحرقة قلبكن
"شكرا" يا هالإمهات لأنكن علّمتونا انو مع الصبر بقي عندكن أمل يطل البطل من بعيد
"شكرا" يا هالإمهات لأنكن علّمتونا انو نرضى بكل اللاعدالة كرمال ولادنا يكبروا بأمان واحترام بغير بلاد
كرمال هاو كلّن ما تعتبوا عليي اذا ما قلتلكن "ينعاد عليكن"...
شيرين حنا