كل خميس "سكارى بالذكارى" وانتو بخير... (شيرين حنا)
اليوم حبيت اكتب بالعامية، حبيت غيّر الموضوع وغوص بهالخميس...
رح نضلنا مختلفين خميس السكارى أو خميس الذكارى...
بس ما بتفرق، لأن بهالخميس رح نجتمع، رغم خفقة الحياة وهموما ومشاكلا... رح نجتمع...
رح ناكل ويمكن نشرب كاس الحاضرين، بس الأكيد رح نستذكر كل اللي راحوا...
كل اللي راحوا وتركولنا هالعادة أو هالتقليد...
كل اللي راحوا ووصلونا للي نحنا علاي اليوم...
كل اللي راحوا وتركوا أثر بنفس كل واحد منا...
يمكن البعض ما يهتم بهالليلة، ويمكن يعتبرا بس مجرد عادة...
بس خلونا بهالعادة...
هالعادة اللي بتجمعنا على طاولة وحدة...
هالعادة اللي رح تخلينا نتشارك نفس اللقمة ويمكن نفس الهم...
هالعادة اللي رح تخلينا نخلق من جو المشاحنات جو العيلة الوحدة...
يعني هالليلة رح يسكروا الحاضرين بذكرى الغايبين...
كل خميس "سكارى بالذكارى" وانتو بخير...
شيرين حنا