إي أنا أم قوية...
إي اليوم عيدي، وبكل بساطة إي بيحقلي عيّد وبيحقلي افرح وانبسط...
إي أنا أم قوية، لما بعد 20 سنة قدرت احبل وجيب طفل ربيه وكبرو واضطر فجأة اني ودعو ليسافر ويهاجر وتحرمني الظروف الاقتصادية من شوفتو...
إي أنا أم قوية، لما بعد ما كبّرت أولادي اضطريت عيش كل ليلة على أعصابي كرمال يواجه الأعداء ليحافظ على الأرض يا مع الفلسطيني أو الاسرائيلي وحتى مع "الشقيق" السوري، فلبست الأسود بليلة ما فيها ضو قمر مع الأوّل وبقيت قاعدة ناطرة رجعة الثاني بعد ما أسروه...
إي أنا أم قوية، لما خبرني الدكتور ابنك رح يولد مع إعاقة والمفضل انك تجهضي، أصرّيت إني ناضل أنا واياه ونكفي الحياة سوا بحلوها ومرها...
إي أنا أم قوية، لما شخصتلي الأخصائية بنتي عندها توحّد ورح تواجهي كتير تحديات، قررت واجه الأمور بفرح معها ونمشي المسيرة فشخة فشخة سوا...
إي أنا أم قوية، لما طلّقني زوجي وحرمني شوف أولادي لأن المحكمة هيك قررت، بقيت تابع أخبارن من بعيد أوقف ورا الشجرة أو ورا شاشة التلفون، بس لأتأكد انن مناح وعايشين مع أني أنا من جوا ميتة...
إي أنا أم قوية، لما مات زوجي ما استسلمت، واجهت وأصريت كون أم وبي لأولادي...
إي أنا أم قوية، لما قررت الحياة يكون وضعنا المادي على قدنا بالكاد قادرين نكفي لآخر الشهر، فأصريت إني كون "مديرة وقديرة وجديرة" لبيتي وعمرو بأحلى وأقوى أولاد ويكبروا ويوصلوا ويلمعوا وشوف حالي فيهن...
إي أنا أم قوية، لما ما قدرت احبل وجيب ولد قرّرت اتبنى وكون أنا بكل ما للكلمة من معنى "أم" وأعطيه كل الحب والحنان اللي حرمتو منو "امرأة" ثانية...
إي أنا أم قوية، لما واجه السرطان قدّام أولادي اللي عم يعيشوا معي هالطريق الصعبة ورغم كل شي عم فرجيهن قداي أنا فعلًا "أم" "قوية"...
إي أنا أم قوية، لما فيق كل يوم وحضر شنط أولادي وجهزهم لينطلقوا على المدرسة، إرجع كفي على شغلي وواجه كل المشاكل والصعوبات وارجع اطبخ وغسل واكوي ونظف بس ليكون كل شي جاهز مجهز لعيلتي، واضحك معهم واسمعلهم ونواجه سوا...
إي أنا أم قوية، لما ربّي أولاد غيري كل يوم بالمدرسة وعلّمهم كيف يواجهوا الحياة بقوّة وصبر وفرح...
إي أنا أم قوية، لما تخطيت كل المجتمع واحتويت ابني "المدمن" ومسكتو بإيدو وأخدتو ليتعالج بمركز معالجة الإدمان...
إي أنا أم قوية، لما قالولي بيّك "الزهايمر" ورح ينساكي، وأصريت إني ابقى معو وصير "أمو" ويعيش آخر ايامو بفرح...
إي أنا أم قوية، لأن بموت مية مرة لأعطي الحياة لكل اللي حولي...
اليوم بدي عايد كل أم بهالحياة لأنو هي فعلًا قويّة وبيحقلها تعيّد رغم كل الظروف...
رئيسة تحرير موقع جزين تحكي
الصحافية شيرين الياس حنا