كتب الأب بطرس العاقوري:
المجد لله...
نسيتوا اصلكن...
ايه يا مارون نسينا وتناسينا....
مجد لبنان نعطى الك، هيك قالولنا...
من سنين طويلة مرقت ع حضورك بهل الشرق...
ومن سنين اطول عشت بجبل قورش وللبنان نتقلوا تلاميذك...
من سنين عتيقة راحت، عملوك بي الطايفة، وتسموا ع اسمك، موارنة، بس للاسف بالاسم...
ب عيد بي الطايفة بتوجه لكل ابناء مارون بلبنان ولي برااا اكتر، دعوة لكل ابناء كنيستي من اكليروس وعلمانيي...
ت ترجعوا لاصالتكن و تردوا مجد لبنان لي بعتوه بعباياتكن المدهبة و كراسيكن المزيفة واطماعكن الضيقة...
مارون، تكلم يا مارون...
الكلام الك، تفضل...
*يا ولادي لي ع اسمي تسميتو شو عملتو فيي؟
شو عملتلكن، ت تاكلو بعضكن وتشوهوا اصالتي وتبهدلوني؟
شو عملتو ببلدكن لي انتو اساسو؟
شو عملتو ب كنيستكن الرهبانية؟ وين شهادتكن؟
وين ايمانكن ل فتفت صخر الوديان و خلق منن مناسك واديار؟
وينكن يا اكليروس و رهبان وراهبات، وينكن من فقركن وشهادتكن؟.
وينكن يا موارنة، كنايسكن صارت فاضية وشتاقت الارض لركابكن ومسابحكن، قولكن انتو واعيين ع ايمانكن؟
شو عملتو بأرضكن لي ارتوت بعرق جدودكن ومعاول رهبانكن، و الارض لي ورتتوها عن لي مات كرمالا واستشهد ت تبقى ؟
شو عملتو، خبروني شو عملتو؟
وهون مارون سكت، ومعو حق يسكت..
عذرني يا مارون القديس...
موارنة اليوم نكروا اسمك وخانو رسالتك ايه، وانا منن....
والله مستحي احكيك واتطلع بوجك...
غريب يا مارون شو عم يصير...
تقاسمنا ع تياب طايفتك، وصرنا احزاب مشرذمين، قتلنا بعضنا كرمال جيبة يهوذا، ولكنها جبينك بالدم والذل، ولبسناك اكليل عارنا ومصالحنا.
قعدنا ب قصور مزينة ومذابح مدهبة، ونسينا الارض لي كانت فراشك، والسما لحافك، والحجر لي بيسند راسك.
طاولتنا حتارت بألوانها، وانت الخبزة كانت تشبعك...
تيابنا مزركشة والعصي من ذهب، وقلوبنا تحجرت...
و نسينا عبايتك الخشنة و عصايتك الخشب وقلبك لي كلو دهب...
لتهينا بالكرسي وبأجريا المكرسحين، ونسينا لبناننا وشعبنا المكرسح...
تهجرنا بهل الدني وصرنا فيا مسؤولين كبار، وبوطننا تشردنا من ذاوتنا وفيا صرنا صغار...
غريب يا مارون كيف قبلان بهيك مجد؟..
مجدك هو شربل ورفقاتو القديسين، الدويهي والبطاركة لي ركعو وصلو وكانو شهادة للعالمين. يوسف كرم وغيرو من الرجال الاحرار وبصلاتن كانو كبار، .وبإيامنا صرنا ندور ع الرجال...
سامحني يا بيي مارون، ومن طايفتك بعتذر وقدام كنيستي بحني عيوني وكياني مستحي.
مارون...
عللي صوتك، قوي صرختك، ضرب بعصايتك، ورمي بكلمتك بعقول ولادك و قلن:
ستحوا بقى، حرام عليكن تهينو تاريخكن ورسالتكن وهويتكن...
فوقوا رح يجي نهار وإجا، إخجل منكن...
المجد لربنا ودايما لله...
ومجد لبنان ما بينعطى الا لشعب بيصلي، بيركع، بيقدس، بيشهد، وبيصرخ بوج كبارو و ذاتو...
عيد مبارك لأهل السما ولكل ماروني بيستحق يكون ابن مارون...
ابونا بطرس..