المجد لله...
بخاف من الليل...
بيقول الكتاب المقدس: مصيبة الشيطان ومشكلتو مع الله، انو فضل الانسان عالملايكة، عطاه مرتبة مميزة قبل كل الملايكة....
نيال انساننا على هالنعمة بس بدكن الانسان يقدر...
اليوم هالكلمات قصة ام بتحكي عن حوار بين طفلتا وملاك...
الطفلة: "" شو بك عم تبكي يا ملاكي؟ انت كمان متلي مش هيك؟ سرقولك ضحكتك بعرف.
طيب ليش؟ شو بدن فينا؟....
بتعرف يا ملاكي؟ بدي خبرك شي....
مبارحة قعدت مع حالي فكر و قول:
انا خلقت عم ببكي وكل الناس لي حولي عم يضحكوا.
طيب بكرا وبعد شوية سنين رح موت، والأجمل يا ملاك،"عم تسمعني؟* انو الكل رح يبكوا عليي وانا عم بضحك...
غريبة هالحياة، لعبة بس ما بتلبقلنا انا وياك...
طيب ليك تجي نلعب لعبة (الغميضة)...
*الملاك: ايه، بس بخاف من الليل، بكرهو ما بحبو...
طيب يا رفيقي شو رايك نتمشى شوي، ندردش سوا؟ نعد نجوم الدنيا و نفلفش ب وراق الليل ونتسمع ع حكي العشاق ونمسح دموع القهر من عيون الناس؟....
يا هالملاك، من عيونك عرفتك موجوع وتعبان....
بس الغريب انو انا الانسانة لي لازم تزعل مش انت...
هموم و زعل، حزن و تعب، قلق من بكرا و خوف من مبارح، ناس بتجي ومن بعد سنين بتغيب عنك وبتروح، بتعمل المستحيل ت تكون احسن بس ما حدا بيفهمك، هودي نحنا يا صديقي الملاك....
وانت ليش زعلان؟ بتخليني امسحلك دمعتك؟????
أول مرة بحس بدمعة كلا حنية وصدق، شو قصتك فيك تقللي؟ شو بك ساكت؟....
طيب رح غمضلك عيونك ت تحكي يمكن مستحي مني، اوك؟
*الملاك: يا هالبنت، يا رفيقتي لي جيتي وما بعرف منين، انا وجعي و دمعتي (انت)????....
عم ببكي لأن ما بحب شوفك موجوعة خايفة أو تعبانة...
من وقت ما خلقتي، بعتني معلمي ت كون جنبك احميكي و احرسك...
رافقك بكل لحظة، امسحلك دمعتك، كون ضحكتك، كون سلوتك، كون بير سرارك، كون الضحكة وقت قهرك، كون الامل وقت يأسك، كون الدوا وقت وجعك، كون الرفيق والخي والصديق وقت لي بيتركوكي أقرب الناس الك....
يا هالبنت، سمحيلي قلك،
بقلبك شفت حنية ما لقيتا بملايكة السما...
ب وجعك شفت جلجلة المصلوب، وب ضحكتك شفت وجوه اطفال العالم، وب عيونك شفت حالي....
وسكت الملاك وراح يتخبا، وانا سكتت وتخبيت متلو...
خلصت اللعبة وطال الوقت، وعيت من غفوتي، ولقيت الملاك شقفة حجر لا بيحكي ولا بيسمع اخبار البشر....
بس جواتي حسيت فيه وهو الحجر، انو احن ب كتير من قلوب البشر...
يا هالملاك لي شكلك حجر، كفي سهرتك مع برد الليل و صوت الشجر، انا راجعة نام و احلم فيك يا احن من البشر، واطلب من ربي لاقي متلك ملاك ع شكل بشر..
انا غفيت، وهو رجع يسكت.
واخر شي بدي قلك،و قلن، جواتي في ملاك، انا لقيتو، هيدا رأيي وحقيقة موجودة.
دايما لله...
يا هالطفلة الملاك، بشكرك
ويا هالانسانة لي كتبت هالكلمات، بشكرك.
كلامك خلاني سافر جواتي يمكن في ملاك ناطرني ت العب الغميضة معو...
وانتو شو ناطرين ما تسافروا جواتكن اكيد في ملاك ناطركن. ..
ابونا بطرس...