بعيد الإستقلال رسالتي للسيد توم براك
أنا هاللبنانية الجنوبية من قضاء جزين، لفتني تعليقك "لبنان دولة فاشلة"
بعيد الإستقلال رح اسألك وخبرك شو يعني فاشلة بمفهومك
إذا كنا مقصد طبابي للعالم العربي والعالمي بمستشفياتنا وطواقمنا الطبية اللي برهنت عن مهاراتها بكل الظروف إن الطبيعية أو الحروب والدمار، لدرجة صرتوا تفتشوا تستوردوا هالنخب لتطوروا مستشفيات الخارج بتوقيع "لبناني"، هيك منكون فاشلة؟
إذا كان الجمال ما بيبيّن إلا بأنامل لبنانية ولمسة تجميلية إن بأطباء التجميل، أو صالونات الشعر والمايك أب، ليظهّر جمال المرأة الدّاخلي والخارجي على حد سواء، وإذا ناسي بتذكرك السيدة أورتاغوس، فهيك منكون فاشلة؟
إذا الأناقة صارت ما بتكتمل إلا بأسرار إيلي صعب وزهير مراد وجورج حبيقة وغيرن كتار ما بتكفي صفحات تتعبى بأسماؤن، لتكون الأزياء اللبنانية عالمية، هيك منكون فاشلة؟
إذا رغم كل الحروب، قادرين شبابنا وصبايانا يتفوقوا ببطولات العرب الرياضية بكرة القدم والسلة و... ويشاركوا ببطولات عالمية رقمية وسيبيرانية وبالرياضيات واللغات... هيك منكون فاشلة؟
إذا قد ما عملت السياسة تفرقة، منتجمّع عند أول خطر بيهدد بلدنا ومنوقف صف واحد مسلمين ومسيحيين متل ما شفتوا بالحرب، هيك منكون فاشلة؟
إذا رغم كل الوجع وكل وقعة منسقط فيها وعند كل محنة، منرجع منوقف ومنكفّي، ومنرفض ننحني إلا ومنعمل حفلات ومنغني ومنسهر ومهرجانات، هيك منكون فاشلة؟
إذا أول معاهد الحوار بين المسيحيين والمسلمين كان بإصدار لبناني بنص بيروت بإحدى أفضل الجامعات، ليرجع الخارج يقتدي بتجربتنا، هيك منكون فاشلة؟
إذا كان نبع القداسة بمار شربل ورفقا والكبوشي وحرديني و...، إذا قديسي العالم اعترفوا انو لبنان "رسالة"، هيك منكون فاشلة؟
إذا عند كل خطر، منركض ومنفتّش على بدلة الجيش لنحس بالأمن والأمان بالحرايق أو الحروب، أو التشتت أو المخدرات، هو وحدو اللي بيجمعنا، هيك منكون فاشلة؟
إذا الصبحية بتكون بفنجان قهوة من إيدين إم أو زوجة، والطريق في "المرحبا"، وبالشغل في "الرفقة"، وبالرجعة في نطرة أولاد وإيدين معباية أغراض، وبعض الظهر جيرة "الأهلا وسهلا"، ولقمة ما بتكمل إلّا باللّمّة والجمعة كل جمعة، وما في خوف تنقطع فيك السيارة لأن لبنان على كبرو عيلة واحدة ووو.... هيك منكون فاشلة؟
قدام كل هول أنا إلي كل الفخر كون دولة فاشلة....
الزعما بيجوا وبيروحوا، والسياسات مش يومية ولكن سويعاتيّة حسب مصالح كل حدا، بس هول كلن ما بيحددوا مين "لبنان"
يمكن الجوع خلى الفساد يستشري، والطمع خلخل أساسات إدارية، بس هول كلن ما بيحددوا مين "لبنان"
لبنان هالدولة الفاشلة بنظركم، خلت الكل "عينو فيه" بأرضو ومصادرو...
أنا إلي كل الفخر كون دولة فاشلة وما صير دولة عم تتغنى فيها حضرتك بوقت ساكت عن البشاعة اللي عم تصير فيها، لاي قدام كل المجازر شو بتفرق سوريا عن نيجيريا باللي عم تعيشو؟، ما بقبل يصير المسيحي بلبنان متل سوريا مصدر "لتجارة الأعضاء"، ولا اخسر جاري وابن بلدي بس لأنو مش من ديني (التجارب الماضية علمتنا)، ولا اسمح لتنظيمات مش معروف "قرعة بيّن من وين" يتسلبطوا عليي وعلى أهلي...
يمكن نسيت حضرتك إنك بالأصل "لبناني" بس حبيت ذكرك، ولمّا بتجي على لبنان بتحط إيدك برئيس جامع على حب الوطن ومدرسة بالوطنية، بإيدين نظيفة مش ملطخة بالدم، رئيس بتفتخر تحادثو وتفاوضو لأنو بيختصر "وطن"
لبنان هيدا الـ10452 كلم مربع، مرقت علاي كتير حروب، وأطماع، وإيدين سودا، بس شعبو شعب مؤمن، وبيعرف انو لو شو ما صار معقول تتغير كتير أمور بس "لبنان" باقي
ان شالله نوصل ليوم نعيّد الاستقلال مزبوط
الصحافية شيرين الياس حنا