المجد لله......
بتقول الوصية...
يا بتعبدني انا الهك او المال بيستعبدك...
وللأسف استعبدني وصرت ديب من ديابو...
اليوم ما رح صلي او اتأمل, رح اطوشكن بكلماتي..
.بترجاكن تحملوني شوي، بس وجع هالقصة، صحوة ضمير وحجر عثرة لكل انسان كل الانسان..
لي رح أكتبه ما رح يعجب الكتار منكن، وخاصة اصحاب المراكز من دين ودنيا...
اعذروني يا اخوتي، صار لازم نوعى من كبوتنا واستعبادنا، وننتفض (لنوقظ العالم) .......
وصايا الله بتقول .لا تعبد ربين الله والمال و لو ما كان المال اله، ما ساواه الله بحالو...
وقفني اليوم مشهد لصديق وهو صاحب ثروة كبيرة، لتقيت فيه و دعيتو عل القداس عن راحة نفس بيو يللي بتربطني فيه صداقة ابوية, فما كان منو الا انو عطاني مبلغ من المال وقلي اداي ""حق القداس يا محترم؟""
و ب استهزاء قللي (( يا ابونا خود هال ٥٠$ وصليلو, شو كان غشيم بيي قضى وقتو بالكنيسة يصلي ل الله, شو نفعو دخلك هو و والكنيسة؟
مات فقير ما عندو فرشة ينام عليا، ليك انا... مصاري وشركة وبيوت، شو بدي ب الله ما بينفعني، وتضحك...)
حكيتو ونصحتو، وع مين عم تقرا مزاميرك يا داوود...
((لهم اذان لا يسمعون، وعيونا ولا ينظرون))..
بآخر المطاف جيت ت أمشي قللي وبمسخرة... (اذا بما بيكفو المصريات دفاع وانا بعطيك ياهن، بركي بستأجرلو شاليه فوق، وتضحك.))...
خجلت من كلامو، قام وترك كرستو لي قرفت من جهلو، و فل. والصراحة ندمان اني حكيتو...
قصتي اليوم طويلة شوي.بس قصة كل واحد و واحدة منا، وسلفا، بشكر اصغاءكن...
رح خبركن عن حياتو وانشالله يقرا ويحس بذنبو....
بيتو منو بيت، مرتو فقيرة واغتنت وآلله يستر، وفهمكن زيادة..
بنتو مطلق، وسامحوني عالتعبير من غصن ل غصن مع (( اصحابا وعشاقا)) عايشي بالرذيلة من ايد ل إيد، وولادا التنين بمدرسة داخلي مش فاضية تربين. ..
ابنو الكبير بالبيت، عاطل عن الحياة (سكر، وطق حنك وبيتعاطى مخدرات)....انسان ومنو انسان, ابن ٢٢ سنة, المصاري بإيدو وما حقو ليرة...
والولد الصغير ابن ل ١٧، ما بيلفي عالبيت قبل الخمسة الصبح، سيارتو معو وجيبتو مليانة، ومدوبل صفو ٣ مرات.....
يعني بيت، إلهو المال والرذيلة هويتو...
يا اخوتي، هيدي حالنا كلنا ومش كلنا....
اذا مش البي، الام، واذا مش الابن الكبير بتكون البنت، والصغير في منو كتير .كلن موجودين ببيوتنا، بغير صور وغير اسامي، يا ريت نشوفن وننتبهلن...
المال يا هالمال، يا اله الظلم والمخدرات والجريمة...شو هل الإله انت،من اي سما جايي، وين خلقت و كيف ربيت معنا؟...
استملكتنا وذليتنا، استعبدتنا وعملت منا اداة بإيدك...
والمصيبة، منعبدك ومربطين حالنا فيك، سامحني يا رب...
يا هالمال، وقف عند حدك بقى يا هالشيطان الاخرس شو نوعك ودينك؟...
يا اخوتي، بنات اليوم ومش الكل، بيركضوا ورا الشاب الحلو والسيارة والجمال والتجميل ولبس ورقة التين (تياب بلا قماش) عرروا اجسادن وباعوها بسوق الخطية كرمال حفنة من المال، صاروا رقم ونكلة رخيصة بإيد الرخاص، والزواج نزوة صار، والتسلاية اكلن اليومي، بس مش كلن...
شبابنا ضايعين ومهووسين ومهلوسين، مخدرات وشرب، و ما بيحكو الا بلغة الجسد والرذيلة و الجريمة وقلة الحيا، همن المال، كيف بيجي ما بتفرق، المهم يطلعو money، بكل الطرق وشو بيقولو: التجارة شطارة...
تجارة المخدرات، دعارة، تجارة اطفال وغش، ورشوة، ونصب و واحتيال وسرقة..الللخ...
العيلة تشتت وغرقت بملذات وهموم الدني،.الكنيسة لشو؟ الله للختيارية ولصغار العقول...
يا أبونا مش فاضيين بدنا نطعمي الولاد..كيف؟ ما بتفرق كيف، لمهم نجيب...
وبجي ع رجال الدين وانا منن، بحاسب حالي قبل غيري....
عذروني اخوتي، جرنا وغرنا المال، بعدنا كتير عن درب الإله الحقيقي، سيارات وتلفونات وتياب chic، وكنايس وصالات مزينة، ومكاتب وجامعات ومدارس ما عم ترحم...
منكب الملايين عليا، وشعبنا جوعان...
الرعية صارت بوادي ونحنا بوادي تاني، والدياب عم تنهش ولادا ب انياب الحقد والضغينة والجوع واللامبالاة...
سامحوني طولت عليكن، صرنا من تباع المال....
كنا ندافع عن قضية معلمنا لي فوق، (اله الحب والصدق والامانة والايمان والخلاص)... واليوم صرنا ندافع عن اله المال، (إله الغش والقتل والجريمة والفساد والخطية)...
يا رب نجينا من غطرستو و حمينا منو...
ومع مارشربل منقول:(هيدا شيطان اخرس انتبهولو) والشاطر بيخلص نفسو...
وما تنسو بشوية مال بعنا الهنا بإيدين بهوذا...
امجد لله...
ااخوتي، نتبهوا ع عيالكن و بيوتكن، ع ايمانكن و هويتكن. ..
ابونا بطرس..