جزين تحكي: ما بيكفي نتمنى من طفل المغارة لازم نفعل... وقفوا حرب ودمار وقتل!

وُلد المسيح... فمجّدوه

25 كانون الأول شو هالتاريخ المجيد، اليوم بيولد المسيح طفل صغير بقلب كل واحد منّا ليزرع الحب والفرح والسّلام الكتير والكبير...

اليوم بداية مسار الحياة والموت والقيامة، كلنا عم نتضرّع وأمنيتنا واحدة قيامة الأوطان و"الأديان" اللي عم تسخّر نصوصها في سبيل المصالح والاقتصاديّة والدّنيويّة...

يسوع اللامحدود، تنازل وتجسّد فحد ذاتو بالزّمان والمكان بس ليخلّصنا، وتركلنا حرّيّة التّصرّف والاختيار والقرار، وشو طلعت هالقرارات غير هرق دماء الأطفال وحروب تحت راية الدّين والنّبوءات؟

الله قلنا "اطلبوا تجدوا"، ونحن عم نطلب السّلام بس الحكي بلا الفعل ما بيوصّل لمحل، نحن بدنا نعيش وأولادنا بسلام، خلص حروب خلص أطماع، العنف ما بيولّد إلّا العنف...

بوقت ما نحن فرحانين وعم نتبادل الهدايا لنعيش روح الميلاد وفرح العيد، في أطفال تُقتل، وبيوت تدمّر، وعالم تُشرّد...

بهالعيد طلب من جزين تحكي للقادة والرؤساء والسياسيين والزعماء: وقفوا حرب وقفوا قتل وقفوا دمار...