امي أسطورة امي ساحرة شريرة... (شيرين الياس حنا)
أنا امي ساحرة شريرة...
امي نبع العيطة، بتضل تصرخ علينا كل ما لعبنا وتركنا ألعابنا بالأرض...
امي بومة كتير بتنق بتضل تقلي هيدي الشغلة غلط ما تعملها وهيدا الشخص ما تتعاطى معو عاطل مش منيح وأنا بعنّد رأيي هوي الصح، وقد ما بتنق بيطلع معها حق...
امي شريرة معها مشط وفرشاية بيئتمروا الها، ما بتقبل اضهر الا ما مشّط شعري وحط ريحة حلوة...
امي سرسابة نظافة، بتجبرنا نغسل ايدينا قبل وبعد الأكل، وكل يوم نتحمم ويضلوا ثيابنا مهفهفين ومرتبين...
امي قاسية بتقاصصنا عطول لما منحكي حكي بلا أخلاق وبلا طعمة...
امي ما بتشعر بحدا، بترغمنا على الأكل ونكفي صحنّا قال حتى نبقى مناح وبصحة جيدة...
امي بلا احساس، ولا مرة وقفت معي لما اتخانق أنا واخواتي...
امي صخرة مجردة من المشاعر، مبارح لما ضربت رفيقي قنعتني اعتذر منو...
امي مخلوق ليلي نهاري، ما بتنام، بتنغصلي فرحتي كل ليلة لما ارجع متأخر من السهرة وهي بعدها قاعدة على الكنباية ناطرتني...
امي بتزهقني، ببقى قاعد أنا واياها وفجأة بتغفى على الكرسي بلا ما تحس...
امي أنانية، بتتركنا مع التاتا أو خالتو أو عمتو... كرمال تروح على الشغل أو على النادي أو تضهر مرة بالسنة مع رفقاتها...
امي بتّعبنا، أنجق تاخدنا من نشاط لنشاط، كأنو ما بيكفينا المدرسة والدرس وهون المصيبة...
امي عطول مكشرة، لما منجيب علامات واطية وبتكون مدرستنا ليوم الدرس بتزعل وبتبرم بوز...
امي ما بتتأثر بشي، عطول بجرب ضايقها بحكيي وكبّر بالكلام وصرّخ بوجهها ما أنا صرت كبير وبفهم وعندي رأيي، بس ما بتتأثر ولا كأنو قلتلها أو عملتلها شي...
امي بخيلة، طلبت منها مصاري لاشتري فستان ما عطيتني بس قبلت تعطي اختي لتجيب كتاب للمدرسة...
امي بشعة بستحي فيها، عطول مبهدلة وما بتجيب ثياب جديدة وما بتلبس على الموضة ولا بتحط ماكياج على وجهها وايديها بيضلوا مشققين...
امي خرفانة، ما خلوها تكفي علمها وما بتعرف تستعمل التلفون ولا الواتساب ولا التيك توك ولا الفايسبوك، حتى ما بتفهم بالـbrands...
امي غراب، من وقت ما مات خيي وهي لابسة هالأسود مسودتلنا عيشتنا...
امي بلا شفقة، كل عمري لما ابكي كنت اركض لعندها الا مبارح لما بكيت ما لاقيتها فلّت على السما عند ربي وخسرتها...
شفتوا لاي امي ساحرة شريرة؟
امي، وشو غالية هالكلمة والغمرة والضحكة والدمعة...
امي انت أسطورة بالحب اللامتناهي...
شيرين الياس حنا