اتركوا المرأة تحكم فهي القرار... (شيرين الياس حنا)

لأنو هي اللي ربت بالحلوة والمرة...

لأنو هي اللي سندت بالفوضى والراحة...

لأنو هي اللي عمرت بالانهيار والأمان...

لأنو هي اللي قالت الحقيقة بالحرب والسلام...

لأنو هي اللي خلقت من الضعف قوة...

لأنو هي اللي رممت وصقلت وأرسلت قادة للمجتمع...

لأنو هي وهي وهي...

ولأنو هي اللي عم تنقتل بلا حق...

ولأنو هي اللي عم تتعنف بلا حماية...

ولأنو هي اللي عم تدّمّر بلا قانون...

ولأنو هي اللي عم تجهض اجبارا...

ولأنو هي وهي وهي...

المرأة منها ناطرة يوم ليضووا على انجازاتها، أو ليعبروا عن تقديرهم أو احترامهم الها...

المرأة واجهت وتحدت وكسرت كل المعايير والمعتقدات، وكل يوم عم تثبت لحالها قبل المجتمع قداي قادرة تكون "قائدة" و"مديرة" و"أم" و"معلمة" و"محامية" و"طبيبة" و"سياسية" و"ميكانيسيانية" و"شوفيرة تاكسي" وبائعة خضار" و"مهندسة"... لامعة بكل خطوة عم تعملها...

نشطت بهالفترة حملات لتشجيع النساء لدخولهن المعترك السياسي أو الانتخابات البلدية والاختيارية لا سيما بلبنان وبمجتمعنا... لاي مين حط الرجل معيار؟ أين كان الرجل أمام أنجيلا ميركل ومارغريت تاتشر وديلما روسيف والملكة اليزابيث الثانية؟ هيدا بحد ذاتو انتقاص من قوة وقدرة المرأة لأنها اذا هي قررت تكون فما رح يكون غيرها... وبالتالي المرأة هي القرار...

فالمرأة منها بحاجة ليوم لتنذكر وتتعايد بالحملات الاعلامية، بل المرأة بحاجة لقانون منصف يحميها من عنف المجتمع الذكوري وتخلفو، لما يحميها من الضرب والقتل واجبارها على خسارة طفلها فقط لعدم رغبة الذكر بتحمل مسؤوليتو، بحاجة للتقدير والاحترام في كل يوم عم تواجهو بكل الصعوبات اللي عم تعيشها...

بيقولوا انها نصف المجتمع، ولكن كم من مرة أثبتت انها المجتمع كامل بذاتو؟ هي اللي أكدت انها قادرة تحمل "مية بطيخة بإيد" فقدرت تقسم وقتها بين تربية أولادها وتدريسهم ونظافتهم ونظافةة بيتها ونجاح شغلها والاهتمام بجمالها وأنوثتها رغم مرضها وتعبها وانكسارها...

كل يوم المرأة عم تعايد حالها بمركزها وبموقعها بتفوقها وتألقها أو لما ترجع تلملم حالها لتوقف وتلمع من جديد وتحفر بصمتها بكل الميادين اللي خاضتها... نحن النساء حلاوة الحياة بجمالنا كيف ما كنا بطبيعتنا وعفويتنا، وصلابة المجتمع بمواقفنا وارادتنا ودعمنا وكلماتنا، وثروة العائلة بتربيتنا وصوننا للأخلاق والقيم بأولادنا، وفرح الحياة بضحكتنا وابتسامتنا...

ولأنو مرفوض نقارن بين المرأة والرجل، ومرفوض المطالبة بالمناصفة، ولأنو كل يوم عيد المرأة، ينعاد على كل امرأة بالقوة والحكمة والصبر و"العقل السليم"...

ولأنو المرأة هي القرار والحل والجرأة والحب والجمال والأنوثة والمواجهة والقوة والصلابة، اتركوا المرأة تحكم!

                                         شيرين الياس حنا