الرئيسية مرآة المجتمع
الخميس 05 - كانون الثاني - 2023

"دايم دايم" مش الليلة وبس... (شيرين الياس حنا)

غريبة هالحياة وغريبين نحن البشر وبالأخص اللبنانيين...

الليلة كلنا منبقى سهرانين، بس سهرانين غير... ناطرين يمرق يسوع...

غريب كيف انو بكل لحظة وتكة يسوع حاضر معنا، ورغم هيك مننطر الليلة ليمرق يسوع...

يمكن منتمسك بهالخبرية وقصة "الدايم دايم" كل واحد لأسبابو الخاصة...

في اللي بينطرو بركي بيمرق معو عزيز تحول لملاك سبقو على السما، فبياخد روحو انو حس فيه الليلة...

في اللي بينطرو وبيحولها لليلة القدر وبتصير كل طلباتو الليلة دافقة، ناسي انو يسوع بيعرف شو بدو بلا ما يحكي...

بس الأغلى بتبقى الأم اللي سهرانة تتضرع لألله ليضل حاميلها أولادها كيف ما راحوا وكيف ما اجوا، هون الطيبة والعفوية...

الليلة كمان منسهر نصلي، تنحس وكأنو لما مار يوحنا عمد يسوع كان عم يعمدنا معو تينظفنا من خطايانا...

غريب كيف انو عنجد يسوع "دايم دايم" معنا بكل خطواتنا ومسيرتنا، بالحلوة والمرة، الوحيد اللي حاضر لو نحن غبنا، وناطر لو قد ما بعدنا، محاوطنا وحامينا...

وغريب كيف لو قد ما ضيعنا الطريق بيبقى حدنا ليردنا، ورغم كل ضعفنا هوي الوحيد اللي بيقوينا...

الليلة ومتل كل صباح وظهر ومسا، رح نصلي يا يسوع تتكون دايم بحفظك للبنان وشعبو اللي عم يعيش الجلجلة بكل الظروف بالميلاد والعماد والصلب، بركي بترأف فينا وبتخلصنا...

وبيبقى نقول للكل دايم علينا وعليكم بالخير والصحة وراحة البال، كل عيد دنح والكل بخير...

                                              شيرين الياس حنا