ما تشربوا عبوا برك الصرف وكهربا ما في... بمنطقة جزين إي بيض ما في

عطول في عجائب الدني السبع، وهلق رح يضيفوا لبنان عليهم ليصيروا 8...

نحن بلد اللي فيه ما في، ما فهمتوا كيف؟ بسيطة....

بتروح على الصيدلية بيقلك دوا ما في
بتروح على السوبرماركت بيقلك حليب ما في
بتروح على محطة الوقود بيقلك مازوت ما في
بتروح على شركة الكهربا بتقلك كهربا ما في
بتروح على شركة الماي بتقلك ماي ما في
بتروح على شركة الغاز بتقلك غاز ما في
بتروح على البنك بيقلك مصاري ما في
وهيك وين ما رحت اي من هالشي ما في

يعني بصراحة حتى قررنا ننزل تما ننذل نعبي ماي عن العين، بس طلع حتى مصاري حق الجرة ما في
قلنا هينة منعمل موقدة وطابونة ومنطبخ، بس طلع حتى مصاري حق طين وحطب ما في
رحنا على فكرة ضوي شمعة بتضوي عتمة، طلع حتى كاز للقنديل والفانوس وشموع ما في

ونحن بمنطقة جزين العجيبة الأكبر بعجائب لبنان، منولد طاقة من الماي ومنخضع لتقنين على التقنين يعني بمعنى بتجي الكهربا الساعة 2 بتنقطع 2:10 بتعرفوا ما بيسوالنا، وبيقطعوا الماي عن الضيع ليعبوا برك الصرف الصحي كرمال مشاريع بتعبيلن جيابن وعمرو ما يكون ناس وعمرو ما يكون أهالي ولو انو ينابيعنا مياهها هادرة ومنتغنى بالشلال وعروس الجنوب.

شو بدكن بالحكي، نحن أحلى عروس وعرساننا أحلى وأحلى واحد شغلو الجدي الصامت لفوق راسو ويا ريت منشوف نتائج، والتاني بروفيسور بكترة الحكي أما التالت بيتغنى بالمحروقات وضيعتو محترق سنسفيل اللي خلقها لا ماي ولا كهربا، والرابع هللولوا للانقاذ وطلع حتى صوت ما الو، بس انتبهوا طلعوا وتشكروهن ورجعوا انتخبوهن وانتو خليكن معزة وغنم اشبعوا كرامة وتدشوا، المهم الرياس والزعما عايشين.

وقبل ما تتنطحوا تدافعوا عن فلان وعلتان، خبروني كيف عايشين وبعدان دافعوا عن ديوككن...

وقبل ما انسى، وللأسف، بمنطقة جزين بيض... ما في