شو يعني "أب"؟... (شيرين حنا)
اليوم عيد الأب، وشو يعني "أب"؟
لاي مش هوي اللي بيجيب مصاري؟
لاي مش هوي اللي بيعيّط وبيصرّخ علينا؟
لاي مش هوي اللي بيضل غايب وما منشوفو؟
لاي مش هوي اللي ما الو جلد يلعب معنا؟
لاي مش هوي اللي ضفيرو بيضلن وسخين؟
شو يعني "أب"؟
بيّك اللي بيجيب المصاري، هوي ذاتو اللي بيتحمّل "عيطة" "البوص" بالشركة، وهوي ذاتو اللي بيتحمّل "تقالة" دم العالم بالمحل، وهوي كمان اللي بيتحمّل استفزاز العالم بالمطعم، وهوي ذاتو اللي عم يزقلك الغراض على السيارة رغم انو كبير بالعمر... قولك المصاري بتجي هيك بلا تعب؟
بيّك اللي بيعيّط وبيصرّخ، هوي ذاتو اللي كان خايف من معشر ابن الجيران، وهوي ذاتو اللي بيسهر كل الليل لترجع بخير وسلامة ويتطمّن عنّك، وهوي ذاتو اللي خايف عليكي من انو يغلط معك شي حدا تما تتأذي وتنجرحي نفسيا وجسديا... جرّبت شي مرة تسألو كيف كان نهارو؟
بيّك اللي بيضل غايب وما بتشوفو، هوي ذاتو اللي ندر حياتو فداء الوطن، فكان على الحاجز أو بالمكتب أو على الطريق بالدرك والجيش وقوى الأمن العام والجمارك و... تانت تكون نايم بفرشتك وما يجي الارهاب والاجرام صوبك، وهوي ذاتو اللي تطوّع بالصليب الأحمر تيساعد اللي بيحتاجو وينقذ حياة، وهوي ذاتو اللي جبرتو الحياة يشتغل "شغلتين" تانت تحصل على اللي بدك اياه... اشتقتلو؟ إي هوي مشتقلك قد الدني بس المهم تكون منيح...
بيّك اللي ما الو جلد يلعب معك، هوي ذاتو اللي برم كل النهار لباع الخضرة متحمّل الشمس والصقعة ومشارعة الناس على الـ250 ليرة، وهوي ذاتو اللي بقي بالمستشفى وبيإيداي شخص عم يموت وعم يحاول يعيشو حتى تلفو أعصابو قبل ما يرجع المريض لحياتو، وهوي ذاتو اللي سهر كل الليل يتصيد تيبيع السمكات تاني نهار ويأمنلك حق ربطة الخبز.... معقول اللي لعّب الحياة تيتأقلم معها ما يكون حابب يلعب معك؟
بيّك اللي ضفيرو وسخين، هوي ذاتو اللي خلّى سيارة "البيك" الضفيرو نضاف تمشي وما يصير معو حادث، وهوي ذاتو اللي جبل الباطون وعمّر بيت للريّس اللي لابس البدلة، وهوي ذاتو كمان اللي صبغ شعرات الست الأمورة لتضلها حلوة، وهوي ذاتو اللي زرع الأرض وانجوى تراب تتاكل العالم... يمكن ضفيرو وسخين بس تأكد مصرياتو كتير نضاف...
وبعدك عم تسأل شو يعني "أب"؟
لكل "بي" بالدني، بدي اشكرك على وقتك، وتعبك، وعرقك، ووساخة ضفيرك، وشيب راسك، وطولة صبرك و... وقد ما احكي ما فيي قلّك إلا الله يخليلنا ياك...
وبيبقى 21 حزيران تاريخ يلخص قوة الحب...