إمي (ندين حنا)
إمي
بلا حضنك يا كبيرة فقدت طعم الدفا
وليالي سودة كثيرة ما عرفت فيها الغفا
شو عبالي إرجع صغير وإركض ليك
وإيديك يا إمي حول جسمي لفلفا.
فتشت عإيديك بكل مرا بصادفا
برمت الدني بكل ناسا ومعارفا
ما لقيت حدا مثلك يا حنوني
يمسح دمعي لما عخدي عيني تذرفا.
وغمرتك يا إمي شو فيها دوا وشفا
بتزول فيها مشاكل هالدني ومخاوفا
ولما بقلبك بغمض عيوني
عدن الجنة بزور وما بعرف أوصفا.
والإم بين القديسين ربي اصطفى
البخالف إمه من غضبه ما بينعفا
كيف بدي بيوم كلامك خالفو
إذا المسيح ما قدر إرادة إمو يخالفا؟
وبالجنة آدم لو كان إمو يعرفا
لما هوا وحب حوا واستلطفا
كانت عالحقيقة فتحتلو عيونو
ومنعتو يشتهي التفاحة ويقطّفا
وإبليس لو كان له إم تعلمه الوفا
لتعلّم كيف شروره بهالكون يوقفا
ركع عإجرين إمه لتسامحه
ودموعه تكرج أنهار عخدوده بالخفا.
ندين حنا