400 ألف... شو المطلوب نشحد؟ (شيرين حنا)
ما رح اكتب بالفصحة اليوم، لأن بركي في حدا من المسؤولين ما عم يفهم علينا، كرمال هيك رح احكيكن "بالدارج" ليوصل الصوت ويودّي ويأنبلكن ضمائركن إذا بعدها موجودة...
الموظفين بمستشفى جزين الحكومي منن شحادين على الطرقات عم يدقوا بواب تياخدوا حسنة، لاء، هول موظفين عم يعملوا شغلن وأكتر بس بدن حقوقن...
الموظفين بمستشفى جزين الحكومي بالحرب ما حسوا بهالاهانة والاذلال قد ما عم يحسوا فيهن هلق، هول ناس بعز دين الظلم كانت رؤوسن مشرئبة لفوق...
الموظفين بمستشفى جزين الحكومي منن لاجئين ولا نازحين، ورغم هيدا الشي ما عم يحصلوا على ربع ما عم يحصلوا الغرباء عنا بالبلد والمنطقة...
الموظفين بمستشفى جزين الحكومي أقل ما يقال الن "شكرا" لأنكن بعدكن مستمرين رغم انو المسؤولين تخلوا عنكن...
اليوم عم اكتب، وعم اتذكر كل وجه وكل وجع من أوجاع هالموظفين، وعم حط حالي محلّن... 400 ألف ليرة بتكفيكن؟
400 ألف ليرة بتخليكن تشتروا لحمة وحليب وطحين وخبز ورز وسكر لولادكن؟ لاء... لأن الـ400 ألف بتزتوها على الطاولة بمطعم لـ"تتفنكروا"...
400 ألف ليرة بتخليكن تسجلوا ولادكن بالمدرسة وتجيبولن القرطاسية والكتب؟ لاء... لأن الـ400 ألف مصروف ولادكن على أسبوع وإذا هني تعلموا لشو الباقيين...
400 ألف ليرة بتخليكن تدفعوا كهربا وماي وتلفونات وبنزين؟ لاء... لأن الـ400 ألف بيبقوا بجيابكن وانتو أصلا معفيين من الضرايب لأنو نحنا اللي عم ندفعن عنكن...
اليوم عم اكتب، وتعبت وقرفت من كترة الحكي اللي منسمعو انو المستشفى ما بتسوى والمستشفى فيها هيك وهيك وهيك وهيك... ووقت اللزوم الكل اختفى وسكت وتخبى بخيال اصبعو... طالما حايدي عن ضهوركن بسيطة...
لاء مش بسيطة انت تسهر وتضهر وتكزدر وتضحك بوقت في ناس عم تبكي محتارة كيف تأمن لقمتها...
لاء مش بسيطة انت عم تتنعم بالسفر والكيف على حساب هالشعب وفي ناس عم تتوجع من همومها وكيف تعيّش ولادها...
لاء مش بسيطة انت عم تنام على مخدّيتك ومش فرقانة معك مين معذّب ومهدّد لأن ساعتها انت صرت بلا ضمير...
اليوم عم اكتب، وبدي أعرف مين سعى من الموجودين انو يتفق مع غيرو تيكونوا إيد وحدة لمصلحة المستشفى؟
مين همّو الناس والموظفين والمرضى والدكاترة؟
مين اذا مرض بيجرب يفوت على المستشفى أو يدعمها تتكفي؟... والله الطبابة ما بتسوى غير ببيروت وبالخارج؟
المستشفى منها دكان، ولا مستوصف... إذا كانت هيك لأنكن انتو حوّلتوها لهيك...
الموظفين منن شحادين، عم يطالبوا بأبسط حقوقن، لأنن بعدن باقيين بأراضيهن ومستمرين...
الكبير من عمر بيي، وبرفض ينذل...
الزغير من عمر خيي، وبرفض ينذل...
وشو عملتوا بالصبايا والستات، عيب نوصل لوقت يطلبوا...
حسّوا على دمكن بقى وفيقوا، لأنو ما في حدا فوق راسو خيمة...
جوّعتونا، وفقّرتونا، وبكّيتونا، وهلق عم تهجرونا... شو المطلوب نشحد؟
شيرين حنا