رح ضلني احكي وجع الناس... (شيرين حنا)
ما بقى فرقانة معي مين بياخد حصة أو لاء، طالما همن الوحيد كيف هالجبنة بدن يقسموها على بعضن...
ما بقى فرقانة معي مين الفريق القوي ومين الخسع، طالما بنظري نحنا آخر همّن، وبالآخر رح يرجعوا تيتي تيتي متل ما رحتي متل ما جيتي...
ما حدا يفكر يجي ويقلّي كيف عم تقولي هيك؟ انتي خاينة للعهد، انتي خاينة للقضية، انتي خاينة للمجتمع المدني... ومش لسبب بالعكس لأسباب...
مين بين الكل همّو اذا الشعب عم ياكل ويشبع أو عم ينام جوعان طالما هوي آكل البيضة وقشرتها!
مين بين الكل همّو إذا الشباب عم يشتغلوا أو عاطلين عن العمل طالما هوي على كش الدبان عم يقبض المبلغ المرقوم كل آخر شهر من دمنا نحنا!
مين بين الكل همّو اذا عم ندفع فاتورة المي والكهرباء مرتين طالما هني معفيّين عأساس هنّي منزلين!
مين بين الكل همّو اذا كنا بلا ضمان منموت بلا استشفا لأن ما في غير الحكومي اللي الدكانة اللي حدنا أحسن منها طالما هني بيسافروا يتحكموا برا!...
وللأسف نحنا شعب بينق بس، لأن عطول مننطر الزعيم تيدفشنا نتحرك، لأن من غشمنتنا هوي كل همو نحنا إي لاء هوي همو مصالحو مش أكتر...
ما حدا لا مسلم ولا مسيحي، لا 8 ولا 14 آذار، لا من هالطرف أو غيرو بيقدر يفتح تمو ويحارجني ولو بنقطة من هالنقاط...
أنا بدي العدل ببلدي...
بدي هالنايب والوزير يقبض الحد الأدنى إذا قام بشغلو لأن هوي أصلا ما عم يعمل غير يكيّل طرقات وقت الحَشْرة، وأصلا بالنسبة إلي ست البيت اللي عاطلة عن العمل ببيتها بتستاهل معاش أهم منو...
بدي هالنايب والوزير توقف مخصصاتو وتعويضاتو، ويدفع كهربا ومي وضرايب متلي متلو، هوي مش أحسن مني بشي...
بدي هالنايب والوزير يعلّم ولادو ويتحكّموا بالحكومي، إي بالحكومي ساعتها بيحس بالسخن وبركي بيحس على دمو...
بدي هالنايب والوزير يسافر على نفقتو الخاصة ودرجة عادية ويصرف من مالو الخاص، لأن أنا أبدى منو بالسفرة على حسابي...
بدي هالنايب والوزير بس يغلط يتعاقب ويتحاسب متلي متلو، ويشيل هـ"الحصانة" اللي صارت تغطية لأعمال عليها علامات استفهام...
بدي هالنايب والوزير يتنقل بالنقل العام متلي متلو، ويشيل هالمواكب البلا طعمة، إذا هوي منيح ومحبوب ما في داعي يخاف على حالو...
وأهم من هيدا كلو، بدي "الحرية"، إي نعم "الحرية"...
أنا ضد القمع وكمّ الأفواه، لأن نحنا بلد "حرّ"، بعز دين الاضطهاد واجهنا ورفضنا الاستبداد...
أنا ضد تهديد كل شخص بالحبس إذا أبدى رأيو، وما حدا يقلي كرامات، لأنو اللي بأبراجن العالية كان أهم انن يحافظوا على كرامات الشعب الفقير...
أنا برفض "اللي بيحاول يكسرني ويطأطئلي راسي"، وبرفض "اللي بيحاول يقطعلي حتى أنفاسي"...
أنا رح دلني قول "للأعور" أعور بعينو، ويلي مش عاجبو يحسن أداؤو ساعتها نحنا من تلقاء أنفسنا منعتذر منو ومنخجل من حالنا...
أنا رح ضلني احكي "وجع الناس" بركي بيوم من الايام بتحسوا في...
فكرمال هول كلّن آخر همي الحكومة ومين بياخد أكتر، ما هيانا قداي النا وعايشين بلاها...
وبس تخلصو نطرتكن للقرار الأميركي الروسي خبرونا...
أنا ما بدي هاجر... تركولي مجال عيش ببلدي...
شيرين حنا