اليوم عرس الكون... اليوم عيد الأمّ (المربّية ماري بطرس)
شرقت الشّمس اليوم عا بكّير
وغطّت بنورها على العتمة
وغرفت من شْعاعاتها الكتير
لتمحي آثار هالظّلمة
والغيمة شربت الميّات
تخبّت بسرعة وعلى عجلة
والعاصفة صارت نْسيمات
حلوة ناعمة وشو خجلة
والعصفور غرّد على الشّبّاك
وقلّي: نايمة بعدك؟
خير انشالله ، قلت
ياطيري شوباك ؟
من الصّبح جايي؟
مُعجب بصوتك؟
قلّي : اليوم عرس الكون
اليوم عيد الأمّ
المهرجان هون وهون
والدّنيِ الفرحة عم تعمّ
قلّي: اخجلي ، قومي
اليوم عيد إمّك
هي اللي رسْمِت البسمِة على تمِّك
النّدى خِجِل من صوت العصافير
وعا شفاف الوردة رسم نجمة
والنّحل وشوش الزّهرات
يصنع العسْلات
يطنْ بالغابات
يعيّط للصْراصِير
للنّمل، للعجلْ
للبقرة ، للغَنْمِة
يعزُمْ الكِلْ
الورد والفلْ
الزّنبق، الأقحوانْ
اللّيمون والرّمانْ
ويعملوا عِرسْ كبير
متلو ما رحْ بيصيرْ
قلت للْعصفورْ:
خجّلتني عنجد!
الفرح فاق الحدْ
أنا اليوم شو بقولْ لَاإمِّي!
اللِّي دمها عم يسري بِدمِّي..
شو بقول لْرفيقة
لْإخت، لْصديقة؟؟
شو بقولْ لْإنسانِة
عنوان التّفاني؟!
عم يعجز لساني
وما عم لاقي الرّدْ!
"ردّيلها"! قلّي
" رديّلها سنين العمر ..
ردّيلها الوفا مع الصّبر..
ردّيلها الحب والتِّحنانْ ..
الطّاعة ، الوِدْ والإيمان..
رِدِّيلها الأمان..
ولا تمِلّي!..
وكمّل وقلّلي"
"تبادلوا الأدوارْ
وتذّكّري شو صار ..
عا مر هالإيّامْ
العاطفة، السّهر!
الصّبح والظهر!
باللّيل وبالنّهار!
بكِل هالأعوام!
تذكّري عمرِك
من صغرِك لكبرِك
تذكّري
تذكّري لمّا خِفتِ مين كان أمانك؟!
ولمّا ضعفتِ مين كان سلطانك؟!
ولمّا ضِعتِ مين كان ربّانك؟!
ولمّا ولمّا ولمّا..
بتعرفي عنجد شو لازم
شو الواجب علَيكِ
هيدا وفا ودين
يا حلوة !!
المربّية: ماري بطرس