المجد لله...
يا من تعمدت، عمدنا بروح التواضع والحب...
ومن لحظة التجسد لوقت ما نسمع صوت من السما:
"هيدا ابني الحبيب لي رضيت فيه" كانت الحكاية، وما رح تخلص...
عمادة مبارك للكل، يربى ب عزكن و دلالكن..
والدايم دايم...
يوحنا مجنون الكلمة عم يلتقي ب يسوع مجنون الحب...
وبين الكلمة والحب رفقة قديمة من عمر الله، رفقة ما بلشت حتى تخلص...
الله من بعد ولادتو من العدرا مريم قرر يثبت انتماؤو لانسانيتنا وتقاليدنا....
الرب يسوع سيد الكون والخليقة، خضع لشريعة البشر وقرر يكون متلنا حتى بضعفنا، ملء التواضع والحب...
وهونيك بنهر الاردن، ماجت ميتو و جنت، ولك كيف لرب الاكوان يجي يزورنا و يسكب طهر قداستو فينا؟ كيف لصاحب النبع الحي، يتنازل ع نهرنا الفقير؟...
يوحنا نعقد لسانو و خجل، كيف؟ ولك كيف لي خالقني بيطلب مني عمدو؟ وانا مني اهل لإستحق هالنعمة...
الله الآب قلبو نفتح، ومن باب السما نزل صوت رج المعمورة كلها وقال: "هيدا ابني الحبيب." ملء التواضع والحب...
الله الروح، حل مثل حمامة نوح لي جابت غصن الحياة بعد الطوفان، والروح حمل نعمة السلام والرجا ب ل حياة كلا وجع وألم و عتمة...
مسا و صباح الدايم، لالو بتركع كل ركبة بهالدني...
يا رب بهالليلة الارض بتركعلك والسما بتهلل بعمادك...
اهل الارض صخر وبشر بتنحني لمجد اسمك...
ايقونة ثالوثك بانت واسمك تبارك....
بيك صوتو نسمع، وروحك ب طهرو ظهر، وانت حملت الكلمة وصرت الامل...
يوحنا رفع ايدو والماي نسكب، وقداسة السما من طهرك غارت وبابا نفتح...
الكتار تعمدوا وجسمن بالماي نغمر، وانت عمادك بالروح القدس والنار، والموت احترق...
العماد منو حدث عادي ولا عيد و مرق...
بالماي والميرون منصير ولاد الآب واخوة للرب وهياكل الروح، هيدي عقيدتنا وهيدا ايماننا وبالقلب نكتب..
العماد منو فولكلور، ولا مايدة وزفة وزهور ملونة وفساتين مزركشة، منو حفلة تنعرض تيابنا ونبين اجسادنا ونصرف اموالنا... وبالنهاية ما عاد سر ولا فعلو فعل...
العماد نعمة من رب الارباب تنصير ملكو، ملكو وحدو مش ملك الزينة وعرض الاجساد وطق الحنك، ومننسى المعنى انو نحنا ولاد الملك...
دايما لله...
اخوتي عيد مبارك عليكن، الرب يباركنا جميعا ويفيض محبتو وبركتو وتواصعو ب معاجن بيوتنا وقلوب عيالنا...
هو الدايم دايم.، استقبلو الرب بقداس، وقربانة مقدسة وما تنسوا لبيوتكن وارزاقكن العجينة و الماي المباركة...
ابونا بطرس...